19th Lt. Col. (L) Rajeev Bakshi Memorial Football Tournament 2025 ṭan

PARBUNG, January 20, 2025, Virthli (Online News Portal): January ni 20, 2006 a Parbung khuoa Phairam helpawl hai le inkâptuonaa Hmarram mipuihai sa himna dinga hringna hlutak inhlantu - Lt. Col. Rajeev Bakhshi SM (P), 13 Dogra Regiment hrietzingna dinga kum tina huoihawta um hlak, 19th Lt. Col. Rajeev Bakshi MemoriaL Football Tournament 2025, 36 AR le PDFA ṭhangruola huoihawta um chu January ni 20, 2025 dâr 11:00 AM khan Parbung Mini Stadium ah Closing Ceremony ûrsuntaka hmang a nih. Hun hmangna hi Mr. Peaceful Hmar, Fin. Secy., PDFA le Nk. Rakili Lalthienghlim han hnetakin an keihruoia, Artiste- Nk. Cindy Darhrilkim, Nk. Ludy Lalremmawi han  hla sakin mipui fekhawm hai an inâwi.

Hi huna hin HYA Parbung Branch han Coffin March an nei a, Lt. Col. Rajeev Bakhshi hrietzingna le inzâna suklangnain toṭawka sûnna hunser hmang a ni bâka pâr inhlanna hunser hmang a nih.

Hi huna hin Shri Asish Das IAS, Deputy Commissioner, Pherzawl District chu Chief Guest in a ṭhang a, Guest of Honour in Colonel R. Naveen Kumar, 36 AR a ṭhang a, Pu Ramdinglien, President, Hmar Inpui, Hmarram Region chu Functional President in a ṭhang. Khuollien hai a'nthawkin thuhril ngai thlâk a ni a, Hmarram mipui hai beidawng le thlaphang taka siemtu, phairam helpawl hai tukdâwlna sin thawa a hringna chen inhlantu, Lt. Col. Rajeev Bakhshi chu inzâna insangtak an pêk thu an hril a, Tipaimukh biela mipui hai a hmangai zie le a hringna khawm thlâkhla lova mipui hai himna dinga a hringna an hlânna le, a thina hmun  kanna hai neia a thi dan chanchin hai an hrietin lungriemin a tlâk hiel thu hai an hril a, hieng ang lâwma Hmarram mipuihai  hmangaitu Lt. Col. Rajeev Bakhshi chu 'Tiger of Tipaimukh' tia koa um chu a phu hlie hlie thu hai an hril a, ama hrietzingna dinga tournament huoihawta um chu hlutsak dingin mitin an fiel a, sports hi taksa sawizawina le hriselna ta dinga ṭha  a ni thu hai hrilin ṭhalai tamtak inruithei laka inthawka sansuoktu a ni zie hai an hril. Hi hunser hi Major Akshay Anand le, Captain Imroj Alam 36 AR hai khawma an uop ve a, Pu James Pusing President, PDFA in khuollien hai chawimawina thilpêk inhlanna a nei.

Chief Guest in kick off na a nei zoin Final Match chu Team 16 hai laia thiem tak ve ve Parbung Youth Club le Sakawrdai GSA han an inkhêl a, an thiemin mipui mit a tlei hle. Sakawrdai GSA chun an khingpui  2-1 a hnein 19th Lt. Col. Rajeev Bakshi Memorial Football Tournament 2025 ah an lo champion ta a nih. Chief Guest in Trophy, Cash Prize- Rs.55000/- le Medal inhlanna a nei a. Guest of Honour in Runners- Up- Parbung Youth Club hai Trophy, Cash prize Rs. 33000/- le Medal an hlan a. Functional President in Individual Prize: Top scorer- James Vanlalpek (Rawvakawt 'A'), Best Player- Lalthanpuia (Sakawrdai GSA), le Best Keeper- Haukhum Songate (Parbung Youth Club) hai chu Memento le Cash prize Rs.3000/- inhlanna a nei a, Pu Lalhriatchhunga EM, Sinlung Hills Council in Match Official hai thilpêk inhlanna a nei a bawk.

Lt.Col. Rajeev Bakhshi sûnna le ama hrietzingna football tournament ṭan a ni hmain, 36th AR Commandant, 13 Dogra Regiment, Pherzawl DC le Parbung Khawtlâng ṭhuoituhaiin Bakhshi Hills le a thina hmun hai kanna an nei a, hi huna hin pâr inhlanna le salute pêkna nei a nih.

19th Lt.Col. Rajeev Bakhshi SM (P) Memorial Football Tournament final match hunser hi Hmarbiel sunga organisation hran hrana ṭhuoituhai, Hmarbiel mipui le, 13 Dogra Regiment han an uop a. Rev. Roparlien Ralsun, PO EAC in ṭawngṭaina neiin hun suktâwp a nih.