Parbung, March 16, 2024, Virthli (ONP): Independent Church of India, Parbung North kohran chun vawisun March 16, 2025 khan Kum 50 a tlingna, Golden Jubilee (1975-2025) hlim le lâwm takin an hmang. Hun hmasa tieng Golden Jubilee lung hawngna hunser hmang a ni a, Upa Sakhawlienin hun hmangna hi a keihruoia, Rev. Timothy Lalzuimawi PS, Hmarbiel North Presbytery in Golden Jubilee Lung hawngna le Pathien kuoma inhlanna a nei a, Jubilee Dâr vuotu dinga thlangsuok um mi 50 ha'n Jubilee Dâr an vuok.
Golden Jubilee hmang huna hin Pastor Laltinsang, North Bengal & Bhutan Mission Field Incharge, Rev. Timothy Lalzuimawi PS, Hmarbiel North Presbytery le Pastor Lalsanglawm ha'n Pathien thucha ropui tak tak el hrilna an nei a, Jubilee thucha ngaithlâk a ni bâkah 'Leadership', 'Church Administration' le 'Church Discipline' chu thupuia hmangin Seminar khawm buotsai a nih.
Jubilee lâwmna hunser a hin Upa Singlienthang, Local Chairman, Parbung North ICI in kohran chanchin hrilna a nei a, kohran member chung tienga lo inlawitahai toṭawka sûnna hunser hmang niin hi kohran suok hmun hran hran le state dang danga lo inpêm tah, hi hunser uop dinga fê khâwm ha'n ngaihlutna thilpêk inhlânna an nei a, kohran lo indin hmasatu chung tienga lo inlawi tahai khawm an sung-le-kuo han ta dingin ṭawngṭaipêkna nei a nih.
Jubilee hmang huna hin Parbung North & South Kristien Ṭhalai Pawl han inpâkna hlapâwl hai sakin hlaa rawngbawlna an nei. Golden Jubilee lâwmna a hin Parbung khawsunga kohran tin hai khawm fiel niin Sielchal le Vawkchal that meuin Jubilee Ruoi tuihnai tak el hlim le lâwm takin kîltlâng a nih.
